Ibong Adarna Kabanata 11 – Buod, Mga Tauhan, Aral, atbp.

Sa artikulong ito, tatalakayin natin ang maikling buod ng Ibong Adarna Kabanata 11: Ang Panalangin ni Don Juan. Bukod pa d’yan, malalaman mo din kung sinu-sino ang mga tauhang nabanggit sa kabanatang ito pati na rin ang aral at mahahalagang kaisipan na mapupulot mo rito.

Mga Nilalaman

Buod ng Ibong Adarna Kabanata 11: Ang Panalangin ni Don Juan

Sa kabanatang ito, makikita natin si Don Juan sa isang napakahirap na kalagayan. Siya ay sugatan at halos hindi na makagalaw habang gumagapang sa gubat. Napakasama ng kanyang kalagayan— may mga pasa at sugat sa buong katawan, at damang-dama niya ang gutom at uhaw. Sa kabila ng mga pisikal na pasakit, patuloy siyang nananalig sa Diyos at sa Birheng Maria.

Sa kanyang panalangin, hiling ni Don Juan na gumaling ang kanyang ama na may sakit. Humihiling siya ng awa, hindi lamang para sa sarili kundi lalo na para sa kanyang mahal na magulang. Kahit nasa bingit ng kamatayan, hindi siya nawawalan ng pag-asa at itinatagubilin niya sa Diyos ang kanyang kapalaran.

Hindi siya makapaniwala sa ginawa ng kanyang dalawang kapatid sa kanya. Aniya’y handa siyang ibigay sa dalawa ang Ibong Adarna at hindi na kailangan pang pagtaksilan siya.

Sa kanyang paghihirap sa naalala niya ang bayang kanyang sinilangan, ang palasyong kanyang kinalakihan, at ang pag-aaruga ng kanyang ina na labis niyang pinananabikan.

Mga Mahahalagang Pangyayari

Si Don Juan ay sugatan at hirap na hirap, gumagapang sa gubat, at damang-dama ang gutom at uhaw.
Sa kabila ng matinding sakit, patuloy siyang nananalig sa Diyos at sa Birheng Maria upang humingi ng tulong at lakas.
Nanalangin si Don Juan na gumaling ang kanyang amang si Haring Fernando, na may sakit, at humihiling siya ng awa hindi lamang para sa kanyang sarili kundi lalo na sa kanyang magulang.
Ipinahayag ni Don Juan ang kanyang pagkalito at pagdaramdam sa ginawa ng kanyang dalawang kapatid, at sinabing handa siyang ibigay sa kanila ang Ibong Adarna nang hindi na kailangang pagtaksilan siya.
Inalala ni Don Juan ang kanyang bayang sinilangan, ang kanyang palasyo, at ang pag-aaruga ng kanyang ina na labis niyang pinananabikan sa gitna ng kanyang pagdurusa.

Mga Tauhan sa Ibong Adarna Kabanata 11

Don Juan – Ang pangunahing tauhan na nagdurusa sa gitna ng gubat. Siya ang nagsasalaysay ng kanyang panalangin sa Diyos at sa Birheng Maria para sa kanyang pamilya at sa sarili.
Haring Fernando – Ang ama ni Don Juan na nasa bingit ng kamatayan at isa sa mga dahilan ng kanyang pagdarasal.

Tagpuan

Ang kabanata ay naganap sa gubat kung saan nag-iisa si Don Juan na sugatan at nagdarasal. Ito ay lugar na puno ng panganib at nagpapakita ng kanyang kalungkutan at pagdurusa.

Talasalitaan

Aglahi – Pangungutya o paghamak.
Hapis – Kalungkutan o pighati.
Kahabagan – Pagkakaroon ng awa o malasakit.
Marilag – Maganda o kaakit-akit.
Nananambitan – Taos-pusong humihiling o nagmamakaawa.
Pita – Matinding pagnanais o hangarin.
Tangkilikin – Suportahan o kalingain.

Mga Aral at Mensahe sa Ibong Adarna Kabanata 11

Sa kabila ng mga pagsubok at paghihirap, ang pananampalataya sa Diyos at pagtawag sa Kanya ang nagbibigay ng lakas at pag-asa.
Ang pagmamahal sa pamilya, lalo na sa magulang, ay nananatiling mahalaga kahit gaano kalalim ang dinaranas na hirap.

At ‘yan ang Ibong Adarna Kabanata 11 Buod, mga Tauhan, at Aral. Kung naging kapaki-pakinabang sa iyo ang araling ito, ibahagi mo ito sa iyong mga kaklase at kaibigan upang sila din ay matuto sa bahaging ito ng korido.

Maaari mo din itong i-share sa iyong mga social media profile. I-click lamang ang share button na makikita sa iyong screen.