Ng at Nang: Pagkakaiba, Tamang Paggamit, at Mga Halimbawa

Ang tamang paggamit ng mga salitang ng at nang sa wikang Filipino ay isa sa mga karaniwang pinagmumulan ng kalituhan sa maraming tao. Ang parehong mga salita ay mahalaga sa ating pang-araw-araw na pakikipagtalastasan at pag-unawa sa kanilang pagkakaiba ay makatutulong upang maging mas malinaw at epektibo ang ating komunikasyon.

Ang artikulong ito ay naglalayong ipaliwanag ang pagkakaiba, tamang paggamit, at magbigay ng mga halimbawa ng ng at nang upang mas maunawaan at magamit ng wasto ng mga mambabasa.

Quick Answer: Ang “ng” ay ginagamit bilang pang-ukol upang ipakita ang pag-aari, layon ng pandiwa, at tagaganap ng pandiwa. Ito ay ay sumasagot sa mga tanong na ano at nino. Ang “nang” ay ginagamit bilang pang-abay na sumasagot sa paano, kailan, gaano, at bakit, bilang pangatnig na katumbas ng “noon,” “upang,” o “para,” at bilang pang-angkop sa inuulit na pandiwa o mala-pandiwa.

Table of Contents

• Pagkakaiba ng “Ng” at “Nang”
• Tamang Paggamit ng “Ng” at mga Halimbawa
  • Pang-ukol sa Pagpapahayag ng Pag-aari
  • Pang-ukol na Pananda ng Layon ng Pandiwa
  • Pang-ukol na Pananda ng Tagaganap ng Pandiwa
• Tamang Paggamit ng “Nang” at mga Halimbawa
  • Pananda na sinusundan ng Pang-abay
  • Pangatnig na Katumbas ng “Noon”
  • Pangatnig na Katumbas ng “Upang” o “Para”
  • Pang-angkop sa Inuulit na Pandiwa o Mala-pandiwa
  • Pinagsamang “Na” at “Na”
  • Pinagsamang “Na” at “Ng”
  • Pinagsamang “Na” at “Ang”
• Konklusyon
• Frequently Asked Questions

Pagkakaiba ng “Ng” at “Nang”

Sa pangkalahatan, ang “ng” ay ginagamit upang mag-ugnay ng mga ideya o bagay sa isang pangungusap, samantalang ang “nang” ay ginagamit upang magbigay-diin sa paraang ginawa ang kilos o naganap ang pangyayari.

Tamang Paggamit ng “Ng” at mga Halimbawa

Ang “ng” ay sumasagot sa mga tanong na ano at nino. Ito ay ginagamit bilang:

Pang-ukol sa Pagpapahayag ng Pag-aari

Sa ganitong konteksto, ang salitang ng ay inilalagay sa pagitan ng dalawang pangngalan (noun). Ang pangngalang sinusundan ng salitang ng ang nagmamay-ari ng unang pangngalang binanggit.

1. kotse ng pari (kotse nino?)
2. laruan ng bata (laruan nino?)
3. bahay ng tiyo (bahay nino?)
4. laptop ng estudyante (laptop nino?)
5. damit ng kapitbahay (damit nino?)
6. kape ng nanay (kape nino?)
7. relos ng tatay (relos nino?)
8. kuwaderno ng guro (kuwaderno nino?)
9. telepono ng manager (telepono nino?)
10. alahas ng lola (alahas nino?)

Pang-ukol na Pananda ng Layon ng Pandiwa

1. Naglinis ng banyo si Carla. (Ano ang nilinis ni Carla?)
2. Si Nena ay nagbasa ng libro. (Ano ang binasa ni Nena?)
3. Nagpinta ng larawan si Leo. (Nagpinta si Leo ng ano?)
4. Si Ella ay nag-ayos ng kwarto. (Ano ang inayos ni Ella?)
5. Nagluto ng adobo si Lola. (Nagluto si Lola ng ano?)
6. Ang Kuya ay naghugas ng kotse. (Ano ang hinugasan ni Kuya?)
7. Nag-aral ng leksyon si Jenny. (Nag-aral si Jenny ng ano?)
8. Si Pedro ay sumulat ng liham. (Ano ang isinulat ni Pedro?)
9. Nagplano ng bakasyon si Ana. (Nagplano ng ano si Ana?)
10. Kumain kami ng biko. (Ano ang kinain namin?)

Pang-ukol na Pananda ng Tagaganap ng Pandiwa

1. Kinain ng pusa ang isda. (Kinain nino ang isda?)
2. Ipinasa ng estudyante ang proyekto. (Ipinasa nino ang proyekto?)
3. Kinunan ng litrato ang artista ng photographer. (Kinunan ng ano ang artista ng photographer?)
4. Binasag ng bata ang bintana. (Binasag nino ang bintana?)
5. Nilinis ng janitor ang sahig. (Nilinis nino ang sahig?)
6. Pinagtimpla ng kape si Nanay ng anak niya. (Pinagtimpla ng ano ng Nanay ng anak niya?)
7. Sinagot ng abogado ang tanong. (Sinagot nino ang tanong?)
8. Ibinenta ng tindero ang prutas. (Ibinenta nino ang prutas?)
9. Inalalayan ng nurse ang pasyente. (Inalalayan nino ang pasyente?)
10. Inawit ng choir ang himno. (Inawit nino ang himno?)

Tamang Paggamit ng “Nang” at mga Halimbawa

Ang “nang” ay ginagamit bilang pang-abay na sumasagot sa mga tanong na paano, kailan, gaano, o bakit. Ito ay ginagamit bilang:

Pananda na sinusundan ng Pang-abay

1. Naglakad nang dahan-dahan si Lola Nida. (Paano naglakad s Lola Nida?)
2. Kumain nang mabilis si Ben. (Paano kumain si Ben?)
3. Naglaro nang maingat ang bata. (Paano naglaro ang bata?)
4. Nagtrabaho nang tahimik si Anna. (Paano nagtrabaho si Anna?)
5. Nagplano nang maayos si Marco. (Paano nagplano si Marco?)
6. Sumayaw nang maganda si Maria. (Paano sumayaw si Maria?)
7. Tumakbo nang mabilis si John. (Paano tumakbo si John?)
8. Lumangoy nang mahusay si Pedro. (Paano lumangoy si Pedro ?)
9. Naglinis nang maaga si Mia. (Kailan naglinis si Mia?)
10. Nagpinta nang maingat si Clara. (Paano nagpinta si Clara?)

Pangatnig na Katumbas ng “Noon”

1. Nagsimula ang programa nang dumating ang bisita. (Kailan nagsimula ang programa?)
2. Bumango ang bahay nang magluto si Mama. (Kailan bumango ang bahay?)
3. Hindi pumasok sa eskuwela si Minda nang magkasakit siya. (Kailan hindi pumasok sa eskuwela si Minda?)
4. Nang pumutok ang bulkan, lumikas ang mga tao. (Kailan lumikas ang mga tao?)
5. Nagkaroon ng brownout nang mawala ang kuryente. (Kailan nagkaroon ng brownout?)
6. Nabasa ang mga damit nang umulan. (Kailan nabasa ang mga damit?)
7. Na-late siya sa trabaho nang magka-traffic. (Kailan siya na-late sa trabaho?)
8. Nang magsalita ang guro, nanahimik ang mga estudyante. (Kailan nanahimik ang mga estudyante?)
9. Nagtakbuhan ang mga tao nang lumindol. (Kailan nagtakbuhan ang mga tao?)
10. Nagpalakpakan ang mga manonood nang tumugtog ang banda. (Kailan nagpalakpakan ang mga manonood?)

Pangatnig na Katumbas ng “Upang” o “Para”

1. Nag-iipon siya nang makabili ng bahay. (Bakit siya nag-iipon?)
2. Nag-aral si Karen nang pumasa sa exam. (Bakit nag-aaral si Karen?)
3. Nagtipid si Bitoy nang makapagbakasyon. (Bakit nagtipid si Bitoy?)
4. Nagtatrabaho siya nang may maipadala sa pamilya. (Bakit siya nagtatrabaho?)
5. Nagsikap si Pablo nang maabot ang pangarap. (Bakit nagsilap si Pablo?)
6. Nagbibisikleta siya nang maging malusog. (Bakit siya nagbibisikleta?)
7. Naglinis si Nanay nang maging maayos ang bahay. (Bakit naglinis si Nanay?)
8. Nagtanim siya nang magkaroon ng ani. (Bakit siya nagtanim?)
9. Nagbabasa si Arnold nang lumawak ang kaalaman. (Bakit nagbabasa si Arnold?)
10. Nagdasal siya nang magtagumpay. (Bakit siya nagdasal?)

Pang-angkop sa Inuulit na Pandiwa o Mala-pandiwa

1. Kanta nang kanta si Elsa.
2. Lakad nang lakad si Pedro.
3. Hugas nang hugas si Maria.
4. Talon nang talon ang bata.
5. Takbo nang takbo si Ben.
6. Sulit nang sulit si Carla.
7. Aral nang aral si Juan.
8. Luto nang luto si Lola.
9. Punas nang punas si Ana.
10. Sayaw nang sayaw si Tina.

Pinagsamang “Na” at “Na”

1. Umalis ka nang hindi nagpapaalam? (Umalis ka na na hindi nagpapaalam?)
2. Kumain ka nang hindi nag-iingay. (Kumain ka na na hindi nag-iingay.)
3. Lumabas ka nang hindi nagagalit. (Lumabas ka na na hindi nagagalit.)
4. Nag-aral ka nang hindi natutulog? (Nag-aral ka na na hindi natutulog?)
5. Nagluto ka nang hindi nagpapahinga? (Nagluto ka na na hindi nagpapahinga?)
6. Naglakad ka nang hindi nagpapahinga. (Naglakad ka na na hindi nagpapahinga.)
7. Nagsalita ka nang hindi nag-iisip. (Nagsalita ka na na hindi nag-iisip.)
8. Naglaro ka nang hindi naghahanda. (Naglaro ka na na hindi naghahanda.)
9. Nagtrabaho ka nang hindi nagpapahinga. (Nagtrabaho ka na na hindi nagpapahinga.)
10. Sumayaw ka nang hindi nag-iingat. (Sumayaw ka na na hindi nag-iingat.)

Pinagsamang “Na” at “Ng”

1. Bigyan nang pagkakataon ang lahat. (Bigyan na ng pagkakataon ang lahat.)
2. Hugasan nang mabuti ang plato. (Hugasan na ng mabuti ang plato.)
3. Talikuran nang tuluyan ang bisyo. (Talikuran na ng tuluyan ang bisyo.)
4. Linisin nang maayos ang kwarto. (Linisin na ng maayos ang kwarto.)
5. Tulungan nang kusa ang mga nangangailangan. (Tulungan na ng kusa ang mga nangangailangan.)
6. Gawin nang tama ang proyekto. (Gawin na ng tama ang proyekto.)
7. Tapusin nang maaga ang gawain. (Tapusin na ng maaga ang gawain.)
8. Ihatid nang ligtas ang mga bata. (Ihatid na ng ligtas ang mga bata.)
9. Bantayan nang maigi ang bahay. (Bantayan na ng maigi ang bahay.)
10. Lutuin nang mabuti ang pagkain. (Lutuin na ng mabuti ang pagkain.)

Pinagsamang “Na” at “Ang”

1. Sobra nang kalupitan ni Trina. (Sobra na ang kalupitan ni Trina.)
2. Malapit nang kaarawan ni Dindo. (Malapit na ang kaarawan ni Dindo.)
3. Labhan nang mga damit sa aparador. (Labhan na ang mga damit sa aparador.)
4. Matagal nang panahon na lumipas. (Matagal na ang panahon na lumipas)
5. Marami nang tao sa plasa. (Marami na ang tao sa plasa.)
6. Mahaba nang pila sa sakayan. (Mahaba na ang pila sa sakayan.)

Konklusyon

Napakahalaga ng tamang paggamit ng ng at nang sa wika upang maiwasan ang kalituhan at maging malinaw sa pagpapahayag ng mga ideya. Ang “ng” ay karaniwang ginagamit upang ipakita ang pag-aari, layon ng pandiwa, at tagaganap ng pandiwa, habang ang “nang” ay ginagamit upang magbigay-diin sa paraan, dahilan, oras, at resulta ng kilos.

Ang pag-unawa at pagsasanay sa wastong paggamit ng ng at nang ay magdudulot ng mas malinaw at mabisang komunikasyon, na mahalaga sa edukasyon, trabaho, at pang-araw-araw na pakikipagtalastasan. Maging mapanuri sa paggamit ng mga salitang ito upang mas epektibong maipahayag ang inyong mga saloobin at kaisipan.

Frequently Asked Questions