El Filibusterismo Kabanata 21 Buod, Mga Tauhan, Aral, atbp.

Sa artikulong ito, tatalakayin natin ang maikling buod ng El Filibusterismo Kabanata 21 – Mga Anyo ng Taga-Maynila. Bukod pa d’yan, pag-aaralan din natin ang mga mahahalagang pangyayari, mga tauhan, tagpuan, talasalitaan, at mga aral, mensahe, o implikasyon na makukuha sa kabanatang ito.

Mga Nilalaman

Buod ng El Filibusterismo Kabanata 21 – Mga Anyo ng Taga-Maynila

Sa gabi ng pagtatanghal ng “Les Cloches de Corneville” sa Teatro de Variedades, punong-puno ang lugar at agad na naubos ang mga tiket. Nasa paligid si Camaroncocido, isang Kastilang pulubi na namumuhay na tila walang pakialam, at si Tiyo Kiko, isang maliit na Pilipinong naglalako ng mga anunsyo ng mga palabas. Sinabi ni Camaroncocido kay Tiyo Kiko na ang malaking kita mula sa palabas ay mapupunta rin sa mga pari dahil sa kanilang impluwensya.

Hati ang opinyon ng mga taga-Maynila tungkol sa palabas. Ang mga pari, tulad nina Padre Salvi, ay tutol dito dahil itinuturing nila itong masagwa at labag sa moralidad. Samantala, may mga taong nagtanggol sa palabas, kabilang na ang mga opisyal ng hukbo at mga taong nais magpakita ng kanilang kaalaman sa wikang Pranses. Dahil sa usaping ito, naging tampulan ng atensyon ang mga pangalan nina Kapitan Heneral, Simoun, Quiroga, at mga artista.

Habang nagmamasid si Camaroncocido, napansin niya ang mga taong tila hindi sanay sa kanilang mga kasuotan at mukhang nagmamatyag. Sa isang pagkakataon, nakita niyang lumapit ang mga ito sa isang karwahe kung saan lulan si Simoun, at narinig niya ang usapang may kaugnayan sa isang hudyat na “isang putok,” na nagpapahiwatig ng isang maselang balak na nagaganap sa likod ng palabas.

Narinig din ni Camaroncocido ang usapan ng dalawang tao na nagsabing ang mga pari ay mas makapangyarihan kaysa sa Heneral, at tila ang kanilang mga galaw ay may kinalaman sa isang mas malalim na plano. Bagaman naaawa si Camaroncocido sa nangyayari sa bayan, pinili niyang huwag makialam at mananatiling walang paki.

Samantala, sa labas ng dulaan, nagkakalat ng kasinungalingan si Tadeo sa isang baguhang kasama, ipinapakitang kilala niya ang mga kilalang tao sa paligid at pinagmamalaking kaibigan niya ang mga ito. Dumating din sina Doña Victorina, Paulita Gomez, Juanito Pelaez, at iba pang kilalang personalidad tulad nina Padre Irene at Don Custodio.

Nang dumating sina Makaraig, Pecson, Sandoval, at Isagani, inalok nila si Tadeo at ang kanyang kasama na sumama sa kanila dahil may sobra silang tiket. Agad na sumama si Tadeo, ngunit ang kanyang kasama ay nag-alinlangan at nagpaiwan dahil sa takot na makaistorbo.

Mga Mahahalagang Pangyayari

Nagkaroon ng marangyang pagtatanghal ng “Les Cloches de Corneville” sa Teatro de Variedades na pinuntahan ng maraming tao, at agad na naubos ang mga tiket, na nagpakita ng mataas na interes ng mga taga-Maynila sa palabas.
Si Camaroncocido, isang Kastilang pulubi na namumuhay nang walang pakialam, ay nagmasid sa paligid kasama si Tiyo Kiko. Nalaman nila na ang kita mula sa palabas ay mapupunta sa mga pari dahil sa impluwensya ng mga ito.
Hati ang opinyon ng mga tao tungkol sa palabas. Ang mga pari, tulad nina Padre Salvi, ay tutol dito at itinuturing na laban sa moralidad, samantalang may mga sumusuporta naman dito, tulad ng mga opisyal ng hukbo at mga taong nais magpakitang-gilas sa wikang Pranses.
Habang nagmamasid, napansin ni Camaroncocido ang mga kahina-hinalang tao na tila may balak na masama. Narinig niya ang usapan tungkol sa hudyat na “isang putok,” na nagbigay ng indikasyon na may nakaambang plano sa likod ng pagtatanghal.
Sa labas ng teatro, si Tadeo ay nagpapanggap at nagkakalat ng kasinungalingan sa kanyang kasama tungkol sa mga kilalang tao sa paligid, nagpapakita ng kanyang ugali na mapagpasikat. Nang dumating sina Makaraig at ang mga kasama nito, inimbitahan nila si Tadeo na sumama sa kanila sa loob dahil may sobra silang tiket.

Mga Tauhan sa El Filibusterismo Kabanata 21

Ito ang mga tauhang nabanggit sa ika-21 Kabanata ng El Filibusterismo:

Camarroncocido

Isang Kastilang pulubi na namumuhay nang walang pakialam sa paligid. Kilala siya sa kanyang kakaibang hitsura at pamumuhay, at lagi siyang naroroon sa mga kaganapan sa Maynila.

Tiyo Kiko

Isang maliit na Pilipinong naglalako ng mga anunsyo ng mga palabas at kaibigan ni Camaroncocido. Siya ay kilala sa kanyang masiglang personalidad at kakaibang anyo.

Padre Salvi

Isang pari na tutol sa pagtatanghal ng operetang Pranses dahil itinuturing niya itong labag sa moralidad at malaswa.

Simoun

Isang mayamang alahero na may lihim na balak at bahagi ng isang plano na nagaganap sa likod ng palabas. Siya ay may mahalagang papel sa mga kaganapan at kumausap sa mga taong kahina-hinala.

Tadeo

Isang mapagpanggap na estudyante na nagkakalat ng kasinungalingan tungkol sa kanyang pagkakakilala sa mga kilalang tao. Isa siya sa mga nasa labas ng teatro na nagbibigay-aliw sa kanyang kasama sa pamamagitan ng kanyang mga kwento. Dahil wala sila Basilio, sa kanya ibinigay ang sobrang tiket ng mga mag-aaral para makanood sa teatro.

Makaraig, Pecson, Sandoval, at Isagani

Mga kabataang estudyante na dumating sa teatro na may sobrang tiket. Inimbitahan nila si Tadeo na sumama sa kanila sa loob.

Tagpuan sa El Filibusterismo Kabanata 21

Ang tagpuan ng kabanata ay sa Teatro de Variendades kung saan ginaganap ang pagtatanghal ng “Les Choches de Corneville” ng mga Pranses.

Talasalitaan sa El Filibusterismo Kabanata 21

Opereta – Isang uri ng dula na may kantahan at sayawan na karaniwang may temang komedya o romantiko.
Teatro de Variedades – Isang tanyag na lugar ng aliwan sa Maynila kung saan ginanap ang pagtatanghal ng mga opereta at iba pang mga palabas na dinadaluhan ng iba’t ibang uri ng tao.
Amerikana – Isang uri ng kasuotan, karaniwang pang-opisina o pormal na pangyayari.
Hudyat – Senyas o palatandaan na nagpapahiwatig ng isang aksyon o pangyayari.
Kura – Mga pari
Kasinungalingan – Mga pahayag na hindi totoo
Tiket – Patunay ng pagbabayad para makapasok o makapanood ng isang palabas
Pulubi – Taong mahirap na kumakalap ng limos
Moralidad – Mga tuntunin sa etika o kagandahang-asal

Mga Aral, Mensahe, at Implikasyon sa El Filibusterismo Kabanata 21

Narito ang mga aral at mahahalagang kaisipan na maaaring mapulot sa Kabanata 21 ng El Filibusterismo:

Ang kabanata ay nagpapakita ng malaking impluwensya ng mga prayle sa lipunan, na kahit sa mga aliwan tulad ng teatro ay nagagawa nilang kontrolin ang opinyon ng publiko, nagpapahiwatig na ang kapangyarihan ng simbahan ay laganap sa lahat ng aspeto ng buhay ng mga tao.
Ipinapakita rin ng kabanata ang pagkakawatak-watak ng lipunan ng Maynila; may mga taong sumusunod sa dikta ng mga prayle at may mga sumasalungat dahil gusto nilang ipakita ang kanilang kalayaan, na sumasalamin sa mas malawak na isyu ng pagnanais ng mga Pilipino na makalaya mula sa impluwensya ng kolonyal na pamahalaan.
Ang kawalang pakialam ni Camaroncocido sa kabila ng kanyang kaalaman sa mga nangyayari ay nagsisilbing paalala na ang kawalan ng aksyon at interes sa mga isyung panlipunan ay maaaring magpahintulot sa patuloy na pang-aabuso at kawalan ng hustisya sa lipunan.

At dito nagtatapos ang El Filibusterismo Kabanata 21 Buod, mga Mahahalagang Pangyayari, Tauhan, Tagpuan, Talasalitaan, at Aral. Naging kapaki-pakinabang ba sa iyo ang araling ito? Kung oo ang iyong sagot, ibahagi mo din ito sa iyong mga kaklase at kaibigan para sila din ay matuto sa unang kabanata ng nobelang ito.

Samantala, maaari mo din itong i-share sa iyong mga social media account. I-click lamang ang share button na makikita sa iyong screen. Para sa karagdagang mga tanong tungkol sa ating aralin, mangyaring mag-iwan ng komento sa ibaba.