Ibong Adarna Kabanata 13 – Buod, Mga Tauhan, Aral, atbp.

Sa artikulong ito, tatalakayin natin ang maikling buod ng Ibong Adarna Kabanata 13: Ang Pagbabalik ni Don Juan. Bukod pa d’yan, malalaman mo din kung sinu-sino ang mga tauhang nabanggit sa kabanatang ito pati na rin ang aral at mahahalagang kaisipan na mapupulot mo rito.

Buod ng Ibong Adarna Kabanata 13: Ang Pagbabalik ni Don Juan

Pagbalik ni Don Juan sa Berbanya matapos ang kanyang pakikipagsapalaran, sinalubong siya ng tuwa ng kanyang ina, ngunit nasindak naman ang kanyang dalawang kapatid. Agad na lumuhod si Don Juan sa kanyang ama bilang paggalang at humalik sa mga kamay nito.

Kasabay nito, ang Ibong Adarna na nakapaloob sa hawla ay nagsimulang umawit ng matamis at kaakit-akit na awitin. Ibinunyag ng ibon ang katotohanan tungkol sa pagkakasala nina Don Pedro at Don Diego, at ang mga pighati na naranasan ni Don Juan dahil sa kanilang pagtataksil.

Nang makatapos sa ika-pitong awit ang ibon ay agad na gumaling si Haring Fernando at bigla itong tumayo. Dahil sa nalaman ng hari ang mga masamang ginawa ng kanyang mga anak sa kanyang bunso ay agad na ipinag-utos na itapon ang dalawa bilang parusa.

Nahabag si Don Juan sa kanyang mga kapatid kaya siya’y lumuhod sa harapan ng kanyang ama upang ihingi sila ng tawad. Sa kabila ng matinding poot at hinagpis na kanyang naramdaman, nahabag ang hari at pinagbigyan ang kahilingan ni Don Juan na patawarin ang kanyang mga kapatid. Nangako sina Don Pedro at Don Diego na hindi na nila uulitin ang kanilang ginawa.

Sa huli, napatawad ni Haring Fernando sina Don Pedro at Don Diego, at muling bumalik ang liwanag sa kaharian dahil sa paggaling ng hari na naging aliwan ang awit ng Adarna.

See also: Ibong Adarna Buod ng Bawat Kabanata 1-46 with Talasalitaan

Mga Mahahalagang Pangyayari

1. Pagbalik ni Don Juan sa Berbanya, sinalubong siya ng tuwa ng kanyang ina, ngunit nasindak ang kanyang mga kapatid na sina Don Pedro at Don Diego.
2. Lumuhod si Don Juan sa harapan ng kanyang ama at humalik sa kamay nito bilang tanda ng paggalang.
3. Ang Ibong Adarna ay umawit ng matamis na awit at ibinunyag ang pagtataksil nina Don Pedro at Don Diego laban kay Don Juan.
4. Gumaling si Haring Fernando matapos ang ika-pitong awit ng Ibong Adarna at agad niyang ipinag-utos na parusahan ang kanyang dalawang anak.
5. Sa kabila ng poot ng hari, nakiusap si Don Juan na patawarin ang kanyang mga kapatid. Pinagbigyan ito ng hari at muling nanumbalik ang kapayapaan sa kaharian.

Mga Tauhan sa Ibong Adarna Kabanata 13

• Don Juan – Ang bunsong anak ni Haring Fernando na matapat at matapang; bumalik sa Berbanya matapos ang kanyang pakikipagsapalaran.
• Haring Fernando – Hari ng Berbanya at ama ni Don Juan; nahirapan sa pagtanggap ng katotohanan tungkol sa pagtataksil ng kanyang mga anak.
• Don Pedro at Don Diego – Mga nakatatandang kapatid ni Don Juan na nagtaksil sa kanya.
• Ibong Adarna – Ang mahiwagang ibon na nagbunyag ng katotohanan tungkol sa pagtataksil nina Don Pedro at Don Diego.

See also: Ibong Adarna Tauhan at mga Katangian ng Bawat Isa

Tagpuan

Ang tagpuan ng kabanata ay sa palasyo ng Berbanya kung saan naganap ang pagbabalik ni Don Juan at ang mga rebelasyon ng Ibong Adarna tungkol sa mga nangyari kay Don Juan at sa pagtataksil ng kanyang mga kapatid.

Talasalitaan

• Kiyas – Itsura o ugali.
• Libis – Mababa at patag na bahagi sa gilid ng bundok o burol.
• Malirip – Maunawaan o maisip; pag-alam sa isang bagay.
• Nabunyag – Nalantad o nalaman ang katotohanan.
• Nakaratay – Nakasalampak o nakahiga, madalas ginagamit para sa mga may sakit o walang kakayahang bumangon.
• Namayagpag – Pagtaas o pag-usbong; natanyag o nagtagumpay.
• Sumapit – Dumating o nakarating sa isang lugar o kalagayan.

Mga Aral at Mensahe sa Ibong Adarna Kabanata 13

1. Mahalaga ang pagpapatawad sa pamilya upang mapanatili ang kapayapaan at pagkakaisa, tulad ng ginawa ni Don Juan sa kanyang mga kapatid.
2. Hindi maitatago ang katotohanan, at darating ang panahon na mabubunyag ito, gaya ng pagsisiwalat ng Ibong Adarna.
3. Sa kabila ng galit at hinanakit, ang pagmamahal at malasakit sa pamilya ang dapat mangibabaw, katulad ng ipinakita ni Haring Fernando sa pag-patawad sa kanyang mga anak.

See also: Kaligirang Pangkasaysayan ng Ibong Adarna

At ‘yan ang Ibong Adarna Kabanata 13 Buod, mga Tauhan, at Aral. Kung naging kapaki-pakinabang sa iyo ang araling ito, ibahagi mo ito sa iyong mga kaklase at kaibigan upang sila din ay matuto sa bahaging ito ng korido.

Maaari mo din itong i-share sa iyong mga social media profile. I-click lamang ang share button na makikita sa iyong screen.