Ibong Adarna Kabanata 9 – Buod, Mga Tauhan, Aral, atbp.

Sa artikulong ito, tatalakayin natin ang maikling buod ng Ibong Adarna Kabanata 9: Ang Mahiwagang Katotohanan. Bukod pa d’yan, malalaman mo din kung sinu-sino ang mga tauhang nabanggit sa kabanatang ito pati na rin ang aral at mahahalagang kaisipan na mapupulot mo rito.

Buod ng Ibong Adarna Kabanata 9: Ang Mahiwagang Katotohanan

Ipinakita ang pagtatapos ng misyon ng tatlong prinsipe matapos nilang makuha ang Ibong Adarna. Sa kanilang pagbabalik, inihanda ng ermitanyo ang isang masaganang piging bilang pagdiriwang sa tagumpay ni Don Juan. Si Don Juan, na nagkaroon ng mga sugat, ay ginamot ng ermitanyo gamit ang isang mahiwagang lunas mula sa bote, at agad na gumaling na parang walang bakas ng sugat. Habang nag-uusap, pinayuhan ng ermitanyo ang tatlong prinsipe na magkaisa at magtulungan sa kanilang pag-uwi upang maiwasan ang anumang hidwaan.

Lumakad na ang tatlong prinsipe pabalik sa Berbanya. Ngunit sa daan habang naglalakad, si Don Pedro pala ay may lihim na galit at inggit kay Don Juan, dahil lagi itong nakakaangat at pinupuri. Balak ni Don Pedro na patayin si Don Juan at sinabi niya ito kay Don Diego.

Bagamat natatakot at nag-aalinlangan, pumayag si Don Diego na bugbugin si Don Juan ngunit hindi nila ito papatayin, bagay na ikinatuwa ni Don Pedro dahil iiwan nila si Don Juan at sila na ang mag-uuwi sa Ibong Adarna.

Kaya naman ginawa nila ang napag-usapan, binugbog si Don Juan at iniwang sugatan sa kagubatan at natitiyak ni Don Pedro na doon na mamamatay ang kanilang bunso. Saka sila tumakas dala ang Ibong Adarna. Hindi nanlaban ang kaawa-awang si Don Juan.

See also: Ibong Adarna Buod ng Bawat Kabanata 1-46 with Talasalitaan

Mga Mahahalagang Pangyayari

1. Matagumpay na nakumpleto ng tatlong prinsipe ang kanilang misyon at nakuha ang Ibong Adarna.
2. Nagdaos ng isang piging ang ermitanyo bilang pagdiriwang sa tagumpay ni Don Juan at ginamot ang kanyang mga sugat gamit ang mahiwagang lunas mula sa bote.
3. Pinayuhan ng ermitanyo ang tatlong prinsipe na magkaisa at magtulungan sa kanilang pag-uwi upang maiwasan ang hidwaan.
4. Sa kanilang paglalakbay pabalik, lumabas ang lihim na galit at inggit ni Don Pedro kay Don Juan at plano niyang patayin ito.
5. Pumayag si Don Diego sa plano ni Don Pedro na bugbugin si Don Juan ngunit hindi papatayin; iniwan nila itong sugatan sa kagubatan at umalis bitbit ang Ibong Adarna.

Mga Tauhan sa Ibong Adarna Kabanata 9

• Don Juan – Ang bunsong prinsipe na nagtagumpay sa kanilang misyon na hulihin ang Ibong Adarna.
• Don Pedro – Ang panganay na prinsipe na may inggit at masamang balak laban kay Don Juan.
• Don Diego – Ang pangalawang prinsipe na natatakot sa posibleng masamang gawin ni Don Pedro ngunit sa huli ay sumang-ayon sa plano ng kanyang kuya.
• Ermitanyo – Ang matandang nagpagaling kay Don Juan at nagbigay ng payo sa tatlong prinsipe.

See also: Ibong Adarna Tauhan at mga Katangian ng Bawat Isa

Tagpuan

Ang kwento ay naganap sa dampa ng ermitanyo kung saan naganap ang piging at ang pagbibigay ng payo sa mga prinsipe at sa kagubatan kung saan binugbog nina Don Pedro at Don Diego si Don Juan.

Talasalitaan

• Himutok – hinanakit o sama ng loob.
• Inahinan – ipinaghanda.
• Lunas – gamot o paraan ng pagpapagaling.
• Magiliw – maayos at mabait na pakikitungo.
• Marikit – maganda o kaakit-akit.
• Mabubunyag – malalantad o mahahayag.
• Piging – handaan o salu-salo.

Mga Aral at Mensahe sa Ibong Adarna Kabanata 9

1. Ang inggit at kasakiman ay nagdudulot ng hidwaan at maaaring magtulak sa isang tao na gumawa ng masama laban sa kanyang kapwa.
2. Ang tunay na pagkakapatiran ay sinusubok sa harap ng mga pagsubok; hindi ito nasusukat sa salita kundi sa gawa at malasakit sa isa’t isa.
3. Ang kawalan ng malasakit at pagtalikod sa kapwa, lalo na sa oras ng pangangailangan, ay nagbubunga ng matinding pagsisisi at mga pangyayari na maaaring hindi na maituwid.

See also: Kaligirang Pangkasaysayan ng Ibong Adarna

At ‘yan ang Ibong Adarna Kabanata 9 Buod, mga Tauhan, at Aral. Kung naging kapaki-pakinabang sa iyo ang araling ito, ibahagi mo ito sa iyong mga kaklase at kaibigan upang sila din ay matuto sa bahaging ito ng korido.

Maaari mo din itong i-share sa iyong mga social media profile. I-click lamang ang share button na makikita sa iyong screen.