Ibong Adarna Kabanata 4 – Buod, Mga Tauhan, Aral, atbp.

Tatalakayin natin sa post na ito ang maikling buod ng Ibong Adarna Kabanata 4: Ang Kabiguan ni Don Diego. Bukod pa d’yan, malalaman mo din kung sinu-sino ang mga tauhang nabanggit sa kabanatang ito pati na rin ang aral at mahahalagang kaisipan na mapupulot mo rito.

Buod ng Ibong Adarna Kabanata 4: Ang Kabiguan ni Don Diego

Si Don Diego ay inutusan ng kanilang ama, na hanapin ang kanyang kapatid na si Don Pedro matapos itong mabigo sa kanyang misyon na hulihin ang Ibong Adarna. Si Don Diego ay naglakbay nang buong tapang, dala-dala sa puso ang pangarap na tulungan ang kanilang mga magulang at ang layuning masagip ang nawawalang kapatid. Sa kanyang paglalakbay, tinahak niya ang mga bundok, gubat, at ilog, nagtiis ng gutom, pagod, at hirap upang makarating sa puno ng Piedras Platas na tinitirhan ng Ibong Adarna.

Sa kabila ng mahabang paglalakbay, si Don Diego ay dumating sa lugar kung saan naroon ang puno ng Piedras Platas. Namangha siya sa kagandahan nito, ngunit napansin niyang walang ibong dumarapo dito maliban sa mahiwagang Ibong Adarna. Sa kanyang pag-upo at paghihintay sa ilalim ng puno, narinig niya ang malambing na awit ng Ibong Adarna na napakaganda at nakakabighani. Dahil sa kagandahan ng awit, si Don Diego ay napapikit at tuluyang na-engkanto. Nang matapos ang pag-awit ng ibong adarna, ito’y nagbawas at pumatak ang dumi kay Don Diego na unti-unting naging bato, katulad ng sinapit ni Don Pedro.

See also: Ibong Adarna Buod ng Bawat Kabanata 1-46 with Talasalitaan

Mga Mahahalagang Pangyayari

1. Inatasan si Don Diego na hanapin ang kanyang kapatid na si Don Pedro.
2. Naglakbay si Don Diego sa mga bundok, gubat, at ilog nang walang takot upang hanapin ang Ibong Adarna.
3. Narating niya ang Piedras Platas at nakita ang kakaibang kagandahan ng puno, ngunit wala ring mga ibong dumadapo rito.
4. Sa kanyang paghihintay, si Don Diego ay na-engkanto ng awit ng Ibong Adarna.
5. Tulad ni Don Pedro, si Don Diego ay naging bato matapos mapatakan ng dumi ng Ibong Adarna.

Mga Tauhan sa Ibong Adarna Kabanata 4

• Don Diego – Ang pangalawang anak na inatasan na hanapin si Don Pedro at ang Ibong Adarna. Siya ay masipag at matiyaga ngunit naging biktima rin ng pagkakaengkanto ng Ibong Adarna.
• Don Pedro – Ang unang prinsipe na naunang naghanap sa Ibong Adarna ngunit nabigo at naging bato.
• Ibong Adarna – Ang mahiwagang ibon na hinahanap ni Don Diego.

See also: Ibong Adarna Tauhan at mga Katangian ng Bawat Isa

Tagpuan

Ang kwento ay naganap sa kagubatan at kabundukan ng Tabor.

Talasalitaan

• Inatasan – Binilinan; pinag-utusan.
• Kinipkip – Itinago.
• Maalindog – Maganda at kaakit-akit.
• Nahapo – Napagod; nawalan ng lakas.
• Nakadalat – Nakarating sa paroroonan.
• Tinunton – Sinundan o nilakbay ang isang direksyon.
• Pagbubulay-bulay – Pagninilay-nilay o malalim na pag-iisip.
• Maririlag – Magaganda at kaakit-akit.

Mga Aral at Mensahe sa Ibong Adarna Kabanata 4

1. Ang pagpapahalaga sa pamilya ay mahalaga kahit sa gitna ng matinding pagsubok. Makikita ito sa pagsusumikap ni Don Diego na hanapin ang kanyang kapatid.
2. Ang mga pagsubok ay bahagi ng paglalakbay ng buhay, at hindi palaging nagtatapos sa tagumpay. Ang mahalaga ay ang tapang at tiyaga sa pagharap dito.
3. Ang pagiging maingat sa pakikinig at pagtanggap ng anumang nakikita at naririnig, tulad ng awit ng Ibong Adarna, ay mahalaga upang maiwasan ang kapahamakan.

See also: Kaligirang Pangkasaysayan ng Ibong Adarna

At dito nagtatapos ang Ibong Adarna Kabanata 4 Buod, mga Tauhan, at Aral. Naging kapaki-pakinabang ba sa iyo ang araling ito? Kung oo ang iyong sagot, ibahagi mo din ito sa iyong mga kaklase at kaibigan para sila din ay matuto sa kabanatang ito ng korido.

Maaari mo din itong i-share sa iyong mga social media profile. I-click lamang ang share button na makikita sa iyong screen.