Sa artikulong ito, tatalakayin natin ang maikling buod ng Noli Me Tangere Kabanata 36 – Ang Unang Suliranin. Bukod pa d’yan, malalaman mo din kung sinu-sino ang mga tauhang nabanggit sa kabanatang ito, ang tagpuan, mga talasalitaan, pati na rin ang mga mahahalagang aral na mapupulot mo rito.
Related: Noli Me Tangere Buod ng Buong Kwento (Maikling Buod)
Mga Nilalaman
- Buod ng Noli Me Tangere Kabanata 36 – Ang Unang Suliranin
- Mga Tauhan sa Noli Me Tangere Kabanata 36
- Tagpuan sa Noli Me Tangere Kabanata 36
- Talasalitaan sa Noli Me Tangere Kabanata 36
- Mga Aral, Mensahe, at Implikasyon sa Noli Me Tangere Kabanata 36
- Mga Kaugnay na Aralin
See also: Noli Me Tangere Kabanata 35 Buod, mga Tauhan, Tagpuan, Talasalitaan, at Aral
Buod ng Noli Me Tangere Kabanata 36 – Ang Unang Suliranin
Dumating nang biglaan ang Kapitan Heneral sa bayan ni Kapitan Tiago, na nagdulot ng abala sa paghahanda para sa kanyang pagdalaw. Habang naghahanda ang mga tao, si Maria Clara ay patuloy na nagdadalamhati dahil sa pagbabawal ng kanyang ama na makipagkita kay Ibarra. Nagmungkahi si Tiya Isabel na sumulat sa Papa at magbigay ng donasyon upang mawalang-bisa ang ekskomunikasyon kay Ibarra. Samantala, si Andeng ay nag-alok na gagawa ng paraan upang magkausap ang dalawang magkasintahan.
Ipinaalam ni Kapitan Tiago kay Maria Clara ang desisyon ni Padre Damaso na putulin ang kanilang relasyon at ihinto ang kasal nila ni Ibarra. Sinabi rin ni Padre Sibyla na hindi na dapat tanggapin si Ibarra sa tahanan nila. Tungkol sa utang ni Kapitan Tiago na limampung libong piso, hindi rin dapat bayaran dahil ang kapalit nito ay pagkawasak ng kaluluwa sa impyerno.
Nalungkot lalo si Maria Clara sa mga narinig, ngunit sinabi ni Kapitan Tiago na may ibang binata na inilaan si Padre Damaso para sa kanya mula sa Europa. Hindi naman nagustuhan ni Tiya Isabel ang naging desisyon, at sinabi niyang hindi parang damit na isinusuot ang magpalit ng katipan. Sa kabila ng iminungkahi ni Tiya Isabel na sulatan ang Arsobispo, nanindigan si Kapitan Tiago na hindi sila pakikinggan nito at ang desisyon ng mga pari ang masusunod.
Dumating na ang Kapitan Heneral at ang mga panauhin, habang si Maria Clara ay nananalangin sa kanyang silid. Tinawag siya ni Tiya Isabel dahil ipinatawag siya ng Kapitan Heneral.
See also: Noli Me Tangere Buod ng Bawat Kabanata 1-64 with Talasalitaan
Mga Tauhan sa Noli Me Tangere Kabanata 36
Ito ang mga tauhang nabanggit sa ika-36 Kabanata ng Noli Me Tangere:
Maria Clara
Ang pangunahing karakter na umiiyak sa ekskomunikasyon ni Ibarra.
Ibarra
Ang kasintahan ni Maria Clara na naging ekskomunikado sa simbahan. Wala siya sa mismong kabanata ngunit nabanggit ang kanyang pangalan.
Tiya Isabel
Ang nag-aalaga kay Maria Clara na nagtatangka na pagaanin ang kalagayan ng dalaga.
Andeng
Isang kaibigan ni Maria Clara na naglakas-loob na makahanap ng paraan para makausap ni Maria Clara si Ibarra.
Kapitan Tiago
Ang ama ni Maria Clara na nagbalita ng mga utos ng simbahan kay Maria Clara.
Padre Damaso
Isang pari na nag-utos na putulin na ang relasyon nina Maria Clara at Ibarra.
Padre Sibyla
Isa pang pari na nag-utos na huwag papapuntahin si Ibarra sa bahay nina Maria Clara.
Kapitan Heneral
Mataas na opisyal ng kolonyal na gobyerno ng Espanya na dumating sa kanilang bahay.
Read more: Noli Me Tangere Tauhan at mga Katangian ng Bawat Isa
Tagpuan sa Noli Me Tangere Kabanata 36
Ang tagpuan ng kabanata ay sa bahay ni Kapitan Tiago.
Talasalitaan sa Noli Me Tangere Kabanata 36
- Ekskomunikado – Ang pag-alis ng isang indibidwal sa kanyang pribilehiyo bilang miyembro ng simbahan
- Umuubra – Gumagana o epektibo
- Putulin – Ihiwalay o itigil
- Nararapat – Angkop o bagay
- Pinsan – Kamag-anak mula sa ikalawang henerasyon
- Nagimbal – Nagulat o natigilan
- Kaluluwa – Ang di-makikitang espirituwal na parte ng isang tao na nananatiling buhay kahit pagkatapos ng kamatayan
- Taimtim – Buong puso at malalim
- Nanalangin – Ang paghiling o pakikipag-usap sa Diyos
Mga Aral, Mensahe, at Implikasyon sa Noli Me Tangere Kabanata 36
Narito ang mga aral at mahahalagang kaisipan na maaaring mapulot sa Kabanata 36 ng Noli Me Tangere:
- Ang kabanatang ito ay nagpapakita ng pagmamahal at pakikibaka ng dalawang magkasintahan, na sina Maria Clara at Ibarra, sa gitna ng mga mapanghusgang tao at maling pamamalakad ng mga pari. Ipinapakita din ng kabanata na ang pag-ibig ay hindi parang damit na pwedeng palitan nang basta-basta.
- Ang moral na aral dito ay ang pahalagahan ang pagmamahal at pagsusumikap para sa minamahal, sa kabila ng mga pagsubok at hadlang na dala ng lipunan at mga taong nasa paligid.
At dito nagtatapos ang Noli Me Tangere Kabanata 36 Buod, mga Tauhan, Tagpuan, Talasalitaan, at Aral. Naging kapaki-pakinabang ba sa iyo ang araling ito? Kung oo ang iyong sagot, ibahagi mo din ito sa iyong mga kaklase at kaibigan para sila din ay matuto sa ika-36 kabanata ng nobelang ito.
Samantala, maaari mo din itong i-share sa iyong mga social media account. I-click lamang ang share button na makikita sa iyong screen. Para sa karagdagang mga tanong tungkol sa ating aralin, mangyaring mag-iwan ng komento sa ibaba.
See also: Noli Me Tangere Kabanata 37 Buod, mga Tauhan, Tagpuan, Talasalitaan, at Aral