Home » Educational » Uri ng Pang-uri: Tatlong Uri ng Pang-uri at mga Halimbawa nito

Uri ng Pang-uri: Tatlong Uri ng Pang-uri at mga Halimbawa nito

Ang mga pang-uriadjectives sa wikang Ingles ay salitang nagbibigay turing o naglalarawan sa isang pangngalan o panghalip. Ito ay nagsasaad ng uri o katangian ng tao, bagay, hayop, pook, o pangyayari.

Bukod sa kayarian, kailanan, kaantasan, at gamit ng pang-uri, ang pang-uri ay mayroon ding uri.

Sa pahinang ito ay tatalakayin natin at matututunan mo kung anu-ano ang tatlong uri ng pang-uri. Gumawa rin kami ng mga halimbawa sa bawat uri ng pang-uri upang mas lalo mong maintindihan ang araling ito.

Mga Nilalaman

Tatlong Uri ng Pang-uri

Ang pang-uri ay may tatlong uri. Ito ay ang panlarawan, pantangi, at pamilang.

Tatlong Uri ng Pang-uri
  • Save

1. Pang-uring Panlarawan

Ang pang-uring panlarawan o descriptive adjective sa wikang Ingles ay nagpapakilala ng uri o kabagayan ng isang pangngalan o panghalip. Nagsasaad ito ng laki, kulay, anyo, amoy, tunog, yari, lasa, o hugis.

Mga Halimbawa ng Pang-uring Panlarawan sa Pangungusap

  • Mahaba ang buhok ni Almira.
  • Si Bb. Hernandez ay mahusay magsalita.
  • Pula ang paboritong kulay ni Sandy.
  • Ang basura ay mabaho.
  • Mapait ang ampalayang niluto mo.
Mga Halimbawa ng Pang-uring Panlarawan
  • Save

2. Pang-uring Pantangi

Sinasabi ng pang-uring pantangi ang tiyak na pangngalan. Binubuo ito ng isang pangngalang pambalana at isang pangngalang pantangi.

Ang pangngalang pantangi o proper adjective na nagsisimula sa malaking titik ay naglalarawan o tumutukoy sa uri ng pangngalang pambalana.

Mga Halimbawa ng Pang-uring Pantangi sa Pangungusap

  • Ang nais ni Kiko na pasalubong ay pansit Malabon.
  • Sa Bicol matatagpuan ang bulkang Mayon.
  • Bukod sa pizza, nais ko rin makatikim ng iba pang pagkaing Italyano.
  • Paborito ni Ema ang suhang Davao.
  • Si Mateo ay mahusay magsalita sa wikang Ingles.
Mga Halimbawa ng Pang-uring Pantangi
  • Save

3. Pang-uring Pamilang

Ang pang-uring pamilang o numeral adjective sa wikang Ingles ay nagsasabi ng bilang, dami, o posisyon sa pagkakasunod-sunod ng pangngalan o panghalip.

Mga Halimbawa ng Pang-uring Pamilang
  • Save

Mayroong anim (6) na uri ang pang-uring pamilang: ang patakaran, panunuran, pamahagi, pahalaga, palansak, at patakda.

A. Patakaran o Kardinal

Ito ang mga likas na bilang na pinagbabatayan ng pagbibilang. Nagsasaad ito ng aktuwal na bilang ng tao o bagay.

Mga Halimbawa ng Pang-uring Pamilang sa Pangungusap (Patakaran)
  • Isa ang melon sa basket.
  • Walo ang alagang pusa ni Rica.
  • Labing isa ang bata sa lansangan.
  • May apat na bulaklak sa plorera.
  • Ang manika ko ay dalawampu.

B. Panunuran o Ordinal

Nagsasaad ito ng pagkakasunod-sunod ng pangngalan o posisyon ng tao o bagay. Sinasabi din nito kung pang-ilan ang tao o bagay sa pangungusap.

Mga Halimbawa ng Pang-uring Pamilang sa Pangungusap (Panunuran)
  • Si Cali ay pangatlo sa magkakapatid.
  • Ang Boracay ang nangunguna sa may pinakamagandang beach sa Pilipinas.
  • Ikalawa sana si Dan sa klase kung siya lumiban at nagkasakit.
  • Si Browni ang ika-apat na alaga kong aso.
  • Mula sa gusaling ito ay pang-pito ang bahay namin.

C. Pahalaga

Ito ay tumutukoy sa pera o salapi. Nagsasaad ito ng halaga ng bagay o anumang binili o bibilhin.

Mga Halimbawa ng Pang-uring Pamilang sa Pangungusap (Pahalaga)
  • Pabili nga po ng sampung pisong mani.
  • Nasasabik na si Baldo sa sampung libong pisong bonus na ipinangako ng kanyang amo ngayong pasko.
  • Kumita ako ng anim na daang piso ngayong araw.
  • Hiniram ni Lani ang aking isang libong piso.
  • Si Janice ay bumili ng halagang tatlong daang pisong bangus.

D. Pamahagi

Ginagamiti ito sa pagbabahagi o pagbubuklod ng ilang hati sa kabuuan.

Kung minsan ay ginagamitan ito ng unlaping tig- para sa pantay na pamamahagi o kapag ang bilang ng bagay na ibinigay o natanggap ay pare-pareho.

Mayroong anyong bahagimbilang o hating-bilang din ang pamahaging pamilang. Maaaring gamitin ang mga salitang bahagdan, persentahe, o porsiyento.

Mga Halimbawa ng Pang-uring Pamilang sa Pangungusap (Pamahagi)
  • Kumuha kayo ng tig-dalawang tinapay ng kapatid mo.
  • Kalahating kilo ang bilhin mong bigas.
  • Nakakuha ako ng sampung porsentong bawas sa bag na binili ko.
  • Nakakuha ng tig-isang bahay sa Bulacan sina Sussy at Susan.
  • May tig-limang tsokolate kayo ni Pam galing kay Mimi.

E. Palansak

Tinutukoy nito ang bilang na bumubuo ng isang pangkat ng tao o bagay na pinagsama-sama. Ito’y grupo o maramihan at inuulit ang unang salita nito o kaya ay nilalagyan ng panlaping han/an.

Mga Halimbawa ng Pang-uring Pamilang sa Pangungusap (Palansak)
  • Dosehan ang laman ng van.
  • Bente-bente na ang tumpok ng gulay ngayon.
  • Kaunting siksik pa po dahil animan ‘yan.
  • Dose-dosena kung mangitlog ang manok ni Isko.
  • Isa-isa lang ang kuha ng pritong manok.

F. Patakda o Tiyak na Bilang

Nagsasaad ito ng tiyak na bilang ng pangngalan. Ang bilang na ito ay hindi na madadagdagan o mababawasan pa.

Ang pag-uulit sa unang pantig ng salitang bilang ang palatandaan nito.

Mga Halimbawa ng Pang-uring Pamilang sa Pangungusap (Patakda)
  • Iisa lang ang anak ni Mang Karding.
  • Dadalawa ang dala kong tinapay.
  • Tatatlo ang nabili kong pato.
  • Aapat ang lang ang aking kaibigan.
  • Lilima ang dadalo sa pagpupulong mamaya sa school.

Mga kaugnay na aralin:

Kung natagpuan mong kapaki-pakinabang ang araling ito, mangyaring ibahagi ito sa iyong mga kaklase at kaibigan para matuto rin sila.

Upang ibahagi ito sa iyong mga social media account, i-click ang share button na makikita sa screen. Maraming salamat!

  • Save
Share via
Copy link