Home » Articles » Noli Me Tangere Kabanata 3 Buod, mga Tauhan, at Aral

Noli Me Tangere Kabanata 3 Buod, mga Tauhan, at Aral

Ang post na ito ay naglalaman ng buod ng Noli Me Tangere Kabanata 3 – Ang Hapunan. Tatalakayin din natin ang mga tauhan sa kabanatang ito, ang tagpuan, mga talasalitaan, pati rin ang mga aral na mapupulot mo sa bahaging ito ng nobela.

Related: Noli Me Tangere Buod ng Buong Kwento (Maikling Buod)

Mga Nilalaman

See also: Noli Me Tangere Kabanata 2 Buod, mga Tauhan, Tagpuan, Talasalitaan, at Aral

Buod ng Noli Me Tangere Kabanata 3 – Ang Hapunan

Handa na ang hapunan at ang bawat panauhin ay papalapit na sa hapag kainan.

Habang nakikita sa mukha ni Padre Sibyla ang kasiyahan sa salu-salo, kabaligtaran naman niya si Padre Damaso. Panay ang dabog ng pari at kitang-kita sa mukha niya na siya ay naiinis.

Pinagmamasdan naman ni Tinyente Guevarra ang kulot na buhok ni Donya Victorina. Hindi niya namalayan na natapakan na niya ang laylayan ng saya ng Donya, bagay na ikinainis ng ginang.

Umupo sa kabisera si Crisostomo Ibarra. Sa kabilang dulo naman ng kabisera ay nagtatalo pa ang dalawang pari kung sino ang mauupo.

Sabi ni Padre Damaso, si Padre Sibyla daw ang dapat maupo doon dahil siya ang kura sa lugar na ‘yon.

Bagay na tinggihan ng pari dahil dapat daw ay si Padre Damaso ang maupo bilang siya ang padre kumpesor ng pamilya ni Kapitan Tiago.

Sa kalaunan, inalok ni Padre Sibyla ang upuan sa Tinyente na agad naman nitong tinanggihan. Tumanggi rin si Kapitan Tiyago ng siya namang inanyayahan ni Ibarra.

Nang maihain na ang pagkain sa hapag, lalong nainis si Padre Damaso dahil ang napunta sa kanyang parte ng tinola ay mga leeg at pakpak ng manok.

Lingid sa kaalaman ng pari, ang espesyal na tinola ay para lamang kay Ibarra.

Sa hapag kainan ay napag-usapan ang mga bagay na ginawa, pinuntahan, at mga natutunan ni Ibarra sa Europa. Bukod dito ay bahagya ding napag-usapan ang kanyang ama na kaibigan din ni Padre Damaso.

Nalaman ni Tinyente Guevarra sa wala pala talagang nalalaman ang binata sa pagkamatay ng kanyang ama.

Samantala, matapos ang pagtitipon ay maagang nagpaalam si Ibarra kaya’t hindi na sila nagkita ni Maria Clara, ang anak na dalaga ni Kapitan Tiago.

See also: Noli Me Tangere Buod ng Bawat Kabanata 1-64 with Talasalitaan

Mga Tauhan sa Noli Me Tangere Kabanata 3

Narito ang mga tauhang nabanggit sa kabanata 3 ng nobelang Noli Me Tangere na isinulat ng ating pambansang bayani na si Jose Rizal.

Padre Damaso

Isang Espanyol na paring Franciscano na kura ng San Diego at lumipat sa Binondo. Matagal nang kaibigan ni Kapitan Tiago at dating kumpesor ng kanyang pamilya.

Don Tiburcio

Ang hilaw na asawa ni Donya Victorina na namumuhay sa kasinungalingan bilang doktor.

Padre Sibyla

Isang paring Dominikano at kasalukuyang kura ng San Diego.

Donya Victorina

Isa sa mga panauhin sa hapagkainan, kilala bilang isang Pilipino na nagpapanggap na Espanyol.

Ibarra

Ang bida ng kwento, na kilala rin bilang si Crisostomo Ibarra, isang edukadong Pilipino na bumalik mula sa pitong taong pag-aaral sa Europa.

Kapitan Tiago

Isa sa mga pangunahing tauhan ng nobela, at ang namumuno sa handaan kung saan nagaganap ang eksena.

Laruja

Isang opisyal ng pamahalaan na kasama sa mga panauhin.

Don Rafael

Ang yumao na ama ni Crisostomo na hindi nagampanan ang kanyang tungkulin bilang isang mabuting ama dahil sa kanyang pagkakakulong at maagang kamatayan.

Read more: Noli Me Tangere Tauhan at mga Katangian ng Bawat Isa

Tagpuan sa Noli Me Tangere Kabanata 3

Ang kabanata na ito ay naganap sa isang hapagkainan, kung saan nagkaroon ng handaan na pinangunahan ni Kapitan Tiago.

Talasalitaan sa Noli Me Tangere Kabanata 3

  • Talakayan – Pagaaral o pagsusuri ng isang bagay na may kinalaman sa isang paksang pinag-uusapan
  • Gigitgitan – Pagdikit o paglapit nang sobra sa isang bagay o tao
  • Laylayan – Ang dulo o gilid ng isang bagay, partikular na ng damit
  • Kabisera – Ang dulo ng hapagkainan kung saan uupo ang pinuno o punong-abala ng handaan
  • Sentrong upuan – Ang upuan sa gitna ng mesa
  • Kura – Ang pari na namamahala o nangangasiwa sa isang parokya
  • Pahanda – Ang inihandang pagkain para sa isang okasyon
  • Tinola – Isang lutuing Pilipino na binubuo ng manok, papaya, at mga dahon ng sili
  • Pakikipag-usap – Proseso ng pagbibigay at pagtanggap ng impormasyon sa pamamagitan ng pagpapalitan ng mga mensahe

Mga Aral, Mensahe, at Implikasyon sa Noli Me Tangere Kabanata 3

Ito naman ang mga aral sa Noli Me Tangere Kabanata 3 – Ang Hapunan.

  • Matutong makisama sa iba. Hindi sa lahat ng pagkakataon ay ikaw ang laging iintindihin ng mga tao sa paligid mo.
  • Bagamat may mga bagay na hindi napagkakasunduan, ang respeto sa isa’t isa ay di dapat mawala. Maaari namang hindi sumang-ayon sa ibang bagay o usapin nang hindi nagiging bastos sa kausap.
  • Sa pagtatalo nina Padre Damaso at Padre Sibyla kung sino ang dapat umupo sa sentrong upuan, nagpapakita ito ng umiiral na panlipunang straktura at kapangyarihan noong panahon ng Espanyol. Ipinapakita din ng eksena na ito ang kahalagahan ng posisyon at estado sa lipunan.
  • Ang pagtatalunan ng mga pari tungkol sa “pinakamahalagang” upuan ay maaaring isang satirikong pagsusuri sa mga gawi at pang-uugali ng mga relihiyosong lider na hindi naaayon sa mga itinuturo nilang mga prinsipyo tulad ng kababaang-loob at pagiging mapagkumbaba.
  • Ang pagkakaiba ng trato sa pagitan ni Ibarra at Padre Damaso sa pagkakabigay ng tinola ay simboliko rin sa mga panahong iyon, kung saan mas prefered ang mga Espanyol kaysa sa mga Pilipino. Sa kabilang banda, binibigyang-diin rin dito ang kahalagahan ng pagpapahalaga at pagmamahal sa sariling bansa at kultura, tulad ng ipinapakita ni Ibarra sa kanyang mga sagot kay Laruja.
  • Ipinapakita rin sa kabanata na ito ang kahalagahan ng komunikasyon. Dahil sa kawalan ng maayos na komunikasyon, hindi nakarating kay Ibarra ang balita tungkol sa kanyang ama na si Don Rafael. Ito’y nagpapakita na ang kawalan ng maayos na komunikasyon ay maaring magdulot ng mga hindi pagkakaunawaan at maaaring magdulot ng mga hindi inaasahang pangyayari.

At dito nagtatapos ang Noli Me Tangere Kabanata 3 Buod, mga Tauhan, tagpuan, talasalitaan, at Aral. Naging kapaki-pakinabang ba sa iyo ang araling ito? Kung oo ang iyong sagot, ibahagi mo din ito sa iba para sila din ay matuto.

Samantala, maaari mo din itong i-share sa iyong mga social media profile. I-click lamang ang share button na makikita sa iyong screen. Para sa karagdagang mga tanong tungkol sa ating aralin, mangyaring mag-iwan ng komento sa ibaba.

See also: Noli Me Tangere Kabanata 4 Buod, mga Tauhan, Tagpuan, Talasalitaan, at Aral

0 Shares
Share via
Copy link