Ibong Adarna Kabanata 46 – Buod, Mga Tauhan, Aral, atbp.

Tatalakayin natin sa post na ito ang maikling buod ng Ibong Adarna Kabanata 46: Ang Hari at Reyna ng Reyno Delos Cristales. Bukod pa d’yan, malalaman mo din kung sinu-sino ang mga tauhang nabanggit sa kabanatang ito pati na rin ang aral at mahahalagang kaisipan na mapupulot mo rito.

Buod ng Ibong Adarna Kabanata 46: Ang Hari at Reyna ng Reyno Delos Cristales

Nagulat si Don Juan sa mabilis na pagdating nila sa Reyno Delos Cristales, ang isang kaharian na dati-rati’y inaabot ng isang buwan bago marating, ngunit ngayon ay narating nila sa loob lamang ng isang oras. Sa kabila ng pagkamatay ng dating hari at mga prinsesa ng reyno, nanatiling mapayapa ito dahil sa mahusay na pamumuno ng mga pumalit sa trono.

Nang dumating si Maria Blanca, malugod siyang tinanggap ng mga mamamayan bilang kanilang bagong reyna. Ang mga taong isinumpa ni Haring Salermo ay nakalaya na. Ang mga batong prinsipe, konde, at du-ke sa hardin ay naging mga buhay na tao muli.

Nagkaroon ng malaking piging sa kaharian kasama ang panalangin para sa mga magulang at mga kapatid ni Maria Blanca na namatay na. Ipinahayad din ni Maria Blanca na si Don Juan ang bagong hari ng Reyno Delos Cristales. Sa loob ng siyam na araw, nagdiwang ang buong kaharian para sa bagong hari at reyna.

Dahil sa magaling at matapat na pamumuno ng bagong hari at reyna, nakamit ng Reyno Delos Cristales ang mas mataas na kaunlaran. Walang isa man sa kanila ang naghirap at ang bawat tahanan ay naging pugad ng pag-ibig.

See also: Ibong Adarna Buod ng Bawat Kabanata 1-46 with Talasalitaan

Mga Mahahalagang Pangyayari

1. Si Don Juan ay nagulat sa mabilis nilang pagdating sa Reyno Delos Cristales, na dati ay inaabot ng isang buwan ngunit ngayon ay isang oras na lamang.
2. Malugod na tinanggap si Maria Blanca ng mga mamamayan bilang bagong reyna ng Reyno Delos Cristales.
3. Ang mga taong isinumpa ni Haring Salermo ay nakalaya na, at ang mga batong prinsipe, konde, at du-ke ay naging mga tao muli.
4. Nagkaroon ng malaking piging sa kaharian upang ipagdiwang ang bagong hari at reyna, at nagpanalangin sila para sa mga magulang at kapatid ni Maria Blanca na namatay na.
5. Si Don Juan ay itinalaga bilang bagong hari ng Reyno Delos Cristales at sa loob ng siyam na araw ay nagdiwang ang buong kaharian.

Mga Tauhan sa Ibong Adarna Kabanata 46

• Don Juan – Ang bagong hari ng Reyno Delos Cristales na nagulat sa mabilis na pagdating sa kaharian.
• Maria Blanca – Ang bagong reyna ng Reyno Delos Cristales na malugod na tinanggap ng mga mamamayan at pinalaya ang mga isinumpang tao.
• Haring Salermo – Ang dating hari na isinumpa ang mga prinsipe, konde, at du-ke na naging bato ngunit naligtas nang si Maria Blanca ay naging reyna.
• Mga Mamamayan ng Reyno Delos Cristales – Ang mga taong masaya at magiliw na tumanggap kay Maria Blanca at Don Juan bilang kanilang bagong hari at reyna.

See also: Ibong Adarna Tauhan at mga Katangian ng Bawat Isa

Tagpuan

Ang kabanata ay naganap sa Reyno delos Cristale kung saan naganap ang pagpapalaya sa mga isinumpang tao at ang pagtatalaga kay Don Juan at Maria Blanca bilang bagong hari at reyna ng kaharian.

Talasalitaan

• Inilakip – Isinama.
• Lilimiin – Pag-iisipang mabuti.
• Magkaramay – Magkasama sa damdamin o nagdadamayan.
• Nagdiriwang – Nagsasaya o nagkakasayahan.
• Panaw – Hindi inaasahang pagkawala, pag-alis, o pagkamatay.
• Parang – Malawak na bukirin o damuhan.
• Piging – Isang marangyang handaan o salu-salo.
• Tinangkakal – Itinaguyod.
• Luwalhati – Isang kalagayan ng mataas na papuri at karangalan dahil sa kagalingan, kagandahan, o dakilang nagawa na nagbibigay ng inspirasyon at respeto mula sa iba.

Mga Aral at Mensahe sa Ibong Adarna Kabanata 46

1. Ang mabuting pamumuno ay nagdudulot ng kaunlaran at kapayapaan sa isang lugar, tulad ng nangyari sa Reyno Delos Cristales sa ilalim ng pamumuno nina Don Juan at Maria Blanca.
2. Ang pagpapatawad at paglaya mula sa mga sumpa ay simbolo ng pagbibigay ng pagkakataon sa mga tao na magbagong-buhay at magkaroon ng bagong simula.
3. Ang pakikiisa ng mga mamamayan sa kanilang pinuno ay mahalaga sa pagkakamit ng tagumpay at kasiyahan ng buong kaharian.

See also: Kaligirang Pangkasaysayan ng Ibong Adarna

At dito nagtatapos ang Ibong Adarna Kabanata 46 Buod, mga Tauhan, at Aral. Naging kapaki-pakinabang ba sa iyo ang araling ito? Kung oo ang iyong sagot, ibahagi mo din ito sa iyong mga kaklase at kaibigan para sila din ay matuto sa kabanatang ito ng korido.

Maaari mo din itong i-share sa iyong mga social media profile. I-click lamang ang share button na makikita sa iyong screen.