Ibong Adarna Kabanata 28 – Buod, Mga Tauhan, Aral, atbp.

Tatalakayin natin sa post na ito ang maikling buod ng Ibong Adarna Kabanata 28: Ang Higanteng Agila. Bukod pa d’yan, malalaman mo din kung sinu-sino ang mga tauhang nabanggit sa kabanatang ito pati na rin ang aral at mahahalagang kaisipan na mapupulot mo rito.

Buod ng Ibong Adarna Kabanata 28: Ang Higanteng Agila

Dumating ang isang higanteng agila na tila labis ang pagod. Nagalit ang ermitanyo dahil sa kahuli-hulihan nitong pagdating na lumabag sa kanyang utos na dapat ay sa oras na marinig ang tunog ng kampana, kailangan makauwi agad ang mga ibon.

Ngunit, humingi ang agila ng paumanhin at nagpaliwanag na siya’y galing sa malayong kaharian ng Reyno delos Cristales. Sa kabila ng bilis ng kanyang paglipad, nahuli pa rin siya dahil sa distansya ng kanyang pinanggalingan.

Kinuwento ng agila ang ganda at kasaganahan ng kaharian, na ikinatuwa ni Don Juan dahil sa wakas, natagpuan na niya ang matagal na niyang hinahanap na kaharian.

Ang ermitanyo ay nag-utos na ihatid ng agila si Don Juan sa kaharian. Ayon sa agila, aabutin ng isang buwan ang paglalakbay bago marating ang banyo ni Maria Blanca. Sinama rin ng ermitanyo ang ibang mga ibon para magdala ng mga gamit at pagkain para sa mahabang paglalakbay ni Don Juan at ng agila. Nagsimulang lumipad si Don Juan sakay sa higanteng agila patungong dakong Silangan.

See also: Ibong Adarna Buod ng Bawat Kabanata 1-46 with Talasalitaan

Mga Mahahalagang Pangyayari

1. Dumating ang higanteng agila na pagod na pagod at tila nanggaling pa sa malayo.
2. Nagalit ang ermitanyo dahil sa hindi pagsunod ng agila sa kanyang utos na dapat ay agad dumating sa oras na tumunog ang kampana.
3. Humingi ng paumanhin ang agila at nagpaliwanag na galing siya sa malayong kaharian ng Reyno delos Cristales.
4. Kinuwento ng agila ang kagandahan at kasaganahan ng kaharian, na ikinatuwa ni Don Juan sapagkat ito ang kanyang matagal nang hinahanap.
5. Ipinag-utos ng ermitanyo na ihatid ng agila si Don Juan sa kaharian, kasama ang iba pang mga ibon na magdadala ng mga gamit at pagkain para sa kanilang mahabang paglalakbay.

Mga Tauhan sa Ibong Adarna Kabanata 28

• Don Juan – Ang pangunahing tauhan na naghahanap sa kaharian ng Reyno delos Cristales.
• Ermitanyo – Ang matandang nagbibigay ng mga tagubilin at nag-utos sa agila na ihatid si Don Juan sa kaharian.
• Higanteng Agila – Ang ibon na naghatid ng balita tungkol sa Reyno delos Cristales at magdadala kay Don Juan patungo doon.

See also: Ibong Adarna Tauhan at mga Katangian ng Bawat Isa

Tagpuan

Ang tagpuan ng kuwento ay sa lugar kung saan naninirahan ang ermitanyo at ang mga ibon, pati na rin ang malayong kaharian ng Reyno delos Cristales.

Talasalitaan

• Dakip – Pagkuha o pagsunggab sa isang tao o bagay.
• Hapo – Matinding pagod o hingal.
• Himpapawid – Kalangitan o alapaap.
• Mainam – Maganda o maayos.
• Namalas – Nakita o nasilayan.
• Nasa – Hangarin.
• Pulong – Pagtitipon o miting.
• Tumambad – Biglang makita o lumitaw sa harapan.

Mga Aral at Mensahe sa Ibong Adarna Kabanata 28

1. Ang pagsusumikap at pagtitiyaga ay mahalaga sa paghahanap ng mga bagay na mahalaga sa atin, gaya ng patuloy na paghahanap ni Don Juan sa Reyno delos Cristales.
2. Ang pagpapatawad at pag-unawa ay mahalaga, tulad ng ginawa ng ermitanyo sa agila matapos itong magpaliwanag sa kanyang pagkahuli.
3. Hindi lahat ng bagay ay makakamtan agad; may mga paglalakbay o pagsubok na matagal bago marating, tulad ng isang buwang paglalakbay patungo sa kaharian ni Maria Blanca.

See also: Kaligirang Pangkasaysayan ng Ibong Adarna

At dito nagtatapos ang Ibong Adarna Kabanata 28 Buod, mga Tauhan, at Aral. Naging kapaki-pakinabang ba sa iyo ang araling ito? Kung oo ang iyong sagot, ibahagi mo din ito sa iyong mga kaklase at kaibigan para sila din ay matuto sa kabanatang ito ng korido.

Maaari mo din itong i-share sa iyong mga social media profile. I-click lamang ang share button na makikita sa iyong screen.