Ibong Adarna Kabanata 27 – Buod, Mga Tauhan, Aral, atbp.

Sa artikulong ito, tatalakayin natin ang maikling buod ng Ibong Adarna Kabanata 27: Ang Ikapitong Bundok. Bukod pa d’yan, malalaman mo din kung sinu-sino ang mga tauhang nabanggit sa kabanatang ito pati na rin ang aral at mahahalagang kaisipan na mapupulot mo rito.

Buod ng Ibong Adarna Kabanata 27: Ang Ikapitong Bundok

Narating ni Don Juan ang ikapitong bundok kung saan mayroong ermitanyo na hanggang baywang ang haba ng balbas. Ang ermitanyo ay nagalit dahil nabulabog ang kanyang katahimikan. Ibinigay ni Don Juan sa ermitanyo ang piraso ng baro na binigay sa kanya ng isang matanda sa kanyang nagdaang paglalakbay. Umiyak ang ermitanyo at tinawag ang Panginoong Hesus.

Sinabi ni Don Juan ang kanyang layunin, ngunit hindi alam ng ermitanyo kung saan ang Reyno delos Cristales. Siya’y limang daang taon ng naninirahan sa bundok, ngunit hindi rin niya alam kung saan matatagpuan ang nasabing kaharian.

Para tulungan si Don Juan, pinatunog ng ermitanyo ang kampana na nasa pintuan na nagsisilbing pantawag sa mga hayop sa Armenya. Sa kabila ng maraming hayop na dumating, wala ni isa man sa kanila ang may alam kung saan matatagpuan ang kaharian.

Upang tulungan pa si Don Juan, ibinigay ng ermitanyo ang kapiraso ng baro kay Don Juan at ipinakiusap sa isang olikornyo na ihatid ang prinsipe sa kapatid nito na isa ring ermitanyo.

Dumating si Don Juan sa bahay ng kapatid ng ermitanyo na ang balbas ay sayad na sa lupa. Nagalit ito dahil sa pangahas na dumating. Ibinigay ni Don Juan ang kapiraso ng baro sa pangalawang ermitanyo. Napaiyak ito at tinawag ang Panginoong Diyos.

Noon di’y nalaman ng ermitanyo ang pakay ni Don Juan. Gayunpaman, kahit na sa loob ng walong daang taon na pamumuhay nito sa bundok, hindi pa rin alam ng ikalawang ermitanyo ang tungkol sa Reyno delos Cristales.

Pinatugtog ng pangalawang ermitanyo ang kampana sa kanyang pintuan, at dumating ang napakaraming uri ng ibon na nagsihanay ayon sa kanilang laki. Ngunit wala rin sa kanila ang may alam tungkol sa lokasyon ng hinahanap na kaharian.

See also: Ibong Adarna Buod ng Bawat Kabanata 1-46 with Talasalitaan

Mga Mahahalagang Pangyayari

1. Narating ni Don Juan ang ikapitong bundok at nabulabog ang katahimikan ng ermitanyo.
2. Ibinigay ni Don Juan ang piraso ng baro mula sa isang matanda, dahilan upang umiyak ang ermitanyo at tawagin ang Panginoong Hesus.
3. Pinatunog ng ermitanyo ang kampana upang tawagin ang mga hayop sa Armenya, ngunit wala sa kanila ang may alam tungkol sa Reyno delos Cristales.
4. Inihatid ng olikornyo si Don Juan sa pangalawang ermitanyo, na may mas mahabang balbas at nagalit sa kanyang pagdating.
5. Tinawag ng pangalawang ermitanyo ang mga ibon sa pamamagitan ng kampana, ngunit tulad ng una, wala ring nakakaalam tungkol sa kaharian.

Mga Tauhan sa Ibong Adarna Kabanata 27

• Don Juan – Ang prinsipe na naghahanap sa Reyno delos Cristales.
• Unang Ermitanyo – Naninirahan sa ikapitong bundok, limang daang taon nang buhay ngunit walang alam tungkol sa Reyno delos Cristales.
• Pangalawang Ermitanyo – Mas matandang ermitanyo na walong daang taon nang nabubuhay ngunit katulad ng una, hindi rin niya alam kung saan ang Reyno delos Cristales.
• Olikornyo – Ang hayop na nagdala kay Don Juan sa pangalawang ermitanyo.

See also: Ibong Adarna Tauhan at mga Katangian ng Bawat Isa

Tagpuan

Ang tagpuan ay sa ikapitong bundok sa Armenya sa tirahan ng unang ermitanyo at sa kalapit nitong bundok na tirahan naman ng ikalawang ermitanyo.

Talasalitaan

• Inatasan – Binigyan ng tungkulin o gawain.
• Nananahan – Naninirahan o tumitira.
• Nakabatid – Nakaalam.
• Pangahas – Matapang o mapusok.
• Parang – Malawak na kapatagan o bukirin.
• Pumiksi – Nagpumiglas.
• Salanggapang – Walang hiya, hindi tapat, manloloko, o hindi mapagkakatiwalaan.
• Tangan – Hawak o dala.

Mga Aral at Mensahe sa Ibong Adarna Kabanata 27

1. Kahit matagal ka nang naninirahan sa isang lugar o sitwasyon, hindi mo pa rin nalalaman ang lahat ng bagay, tulad ng mga ermitanyo na hindi alam ang tungkol sa Reyno delos Cristales.
2. Ang pagtutulungan ng iba’t ibang nilalang, tulad ng mga ermitanyo at hayop, ay nagpapakita ng kahalagahan ng pagtulong sa kapwa kahit hindi tiyak ang kalalabasan.
3. Ang tiyaga at determinasyon ni Don Juan sa kabila ng kawalan ng kasiguraduhan ay nagbibigay ng inspirasyon na huwag sumuko sa harap ng mga hadlang sa buhay.

See also: Kaligirang Pangkasaysayan ng Ibong Adarna

At ‘yan ang Ibong Adarna Kabanata 27 Buod, mga Tauhan, at Aral. Kung naging kapaki-pakinabang sa iyo ang araling ito, ibahagi mo ito sa iyong mga kaklase at kaibigan upang sila din ay matuto sa bahaging ito ng korido.

Maaari mo din itong i-share sa iyong mga social media profile. I-click lamang ang share button na makikita sa iyong screen.