Ibong Adarna Kabanata 25 – Buod, Mga Tauhan, Aral, atbp.

Sa artikulong ito, tatalakayin natin ang maikling buod ng Ibong Adarna Kabanata 25: Ang Bagong Mundo. Bukod pa d’yan, malalaman mo din kung sinu-sino ang mga tauhang nabanggit sa kabanatang ito pati na rin ang aral at mahahalagang kaisipan na mapupulot mo rito.

Mga Nilalaman

Buod ng Ibong Adarna Kabanata 25: Ang Bagong Mundo

Sa tatlong taong paglalakbay ni Don Juan sa mga parang at gubat, sa halip na mapalapit sa Reyno delos Cristales ay lalo siyang naligaw at napalayo. Sa gitna ng kanyang pagkalito, natagpuan niya ang isang matanda at humingi siya ng tulong dahil sa gutom. Nagbigay ang matanda kay Don Juan ng durog at bukbukin na itim na tinapay. Sa kabila ng hindi kaaya-ayang hitsura ng tinapay, hindi na nag-atubili si Don Juan dahil sa sobrang gutom. Sa kanyang gulat, masarap at nakakabusog ang tinapay.

Pinakain din siya ng matanda ng pulot-pukyutan at inalok ng tubig mula sa bumbong. Nagtaka si Don Juan dahil kahit ininom na niya ang tubig, hindi ito nababawasan. Dahil dito, unti-unti siyang bumalik sa kanyang dating lakas at sigla.

Nagulat ang matanda nang malaman na ang layunin ni Don Juan na makarating sa Reyno delos Cristales. Sa loob ng isang daang taon, hindi niya alam kung paano makakarating doon. Sa halip, ipinayo niya kay Don Juan na pumunta sa ikapitong bundok at hanapin ang isang ermitanyo.

Binigyan pa rin ng matanda si Don Juan ng isang piraso ng baro na magiging daan upang paglingkuran siya ng ermitanyo. Sinabi din ng matanda na ipabatid ni Don Juan sa ermitanyo na ang kapirasong baro ay mula sa isang sugatang matanda.

Mga Mahahalagang Pangyayari

Pagkaligaw ni Don Juan sa loob ng tatlong taong paglalakbay patungo sa Reyno delos Cristales.
Nakilala ni Don Juan ang isang matanda na nagbigay sa kanya ng tinapay na durog at bukbukin, na sa kabila ng hindi magandang anyo ay masarap at nakakabusog.
Pinakain ng matanda si Don Juan ng pulot-pukyutan at tubig mula sa bumbong na hindi nauubos.
Ibinigay ng matanda ang payo na pumunta si Don Juan sa ikapitong bundok at hanapin ang ermitanyo.
Binigyan si Don Juan ng piraso ng baro na magsisilbing tanda para matulungan siya ng ermitanyo.

Mga Tauhan sa Ibong Adarna Kabanata 25

Don Juan – Ang pangunahing tauhan na naghahanap ng paraan upang makarating sa Reyno delos Cristales.
Matanda – Ang nagbigay ng pagkain at inumin kay Don Juan at nagbigay din ng payo at baro na magsisilbing tulong sa kanyang paghahanap.
Ermitanyo – Ang sinabi ng matanda na makakatulong kay Don Juan kapag nahanap niya ito.

Tagpuan

Ang tagpuan ng kabanata ay sa isang daan kung saan natagpuan ni Don Juan ang isang matanda na tumulong sa kanya at nagpayo na pumunta sa ika-pitong bundok upang hanapin ang isang ermitanyo na maaaring makatulong sa kanyang hinahanap na lugar.

Talasalitaan

Biyas – Bahagi ng katawan ng tao na pinaghuhugpungan o pinagdudugtungan ng braso at ng hita.
Bumbong – Isang uri ng lalagyan na gawa sa kawayan.
Bukbukin – Anay na naninira ng kahoy o iba pang materyales.
Kuro – Opinyon o pananaw.
Masigasig – Masipag.
Napalaot – Nakapasok o napunta sa malalim na bahagi ng dagat.
Pirurutong – Isang uri ng malagkit na kanin, kadalasang kulay itim.
Tutong – Nasunog na bahagi ng kanin.

Mga Aral at Mensahe sa Ibong Adarna Kabanata 25

Sa harap ng mga pagsubok, dapat manatiling matiyaga at hindi sumuko, gaya ni Don Juan na patuloy na naglakbay kahit naliligaw.
Ang tulong ay maaaring dumating mula sa hindi inaasahang mga tao o bagay, tulad ng matanda na hindi akalain ni Don Juan na magbibigay ng mahalagang tulong.
Huwag husgahan ang mga bagay ayon sa panlabas na anyo, tulad ng pagkain na inihandog ng matanda na sa kabila ng hindi magandang itsura ay masarap at nakakabusog.

At ‘yan ang Ibong Adarna Kabanata 25 Buod, mga Tauhan, at Aral. Kung naging kapaki-pakinabang sa iyo ang araling ito, ibahagi mo ito sa iyong mga kaklase at kaibigan upang sila din ay matuto sa bahaging ito ng korido.

Maaari mo din itong i-share sa iyong mga social media profile. I-click lamang ang share button na makikita sa iyong screen.